Instituti GAP, Grupi për Studime Juridike dhe Politike (GLPS), dhe Instituti i Prishtinës për Studime Politike (PIPS), mbajnë konferencë për media, me temën “Monitorimi i realizimit të objektivave nga Agjenda për Reforma Evropiane (ERA)” .

Instituti GAP, GLPS dhe PIPS me mbështetje të Ambasadës Holandeze në Kosovë janë duke bashkëpunuar në projektin e monitorimit dhe avokimit të mëtejshëm të zbatimit të Agjendës për Reforma Evropiane (ERA).

Agjenda për Reforma Evropiane (ERA) është një marrëveshje e nivelit të lartë në mes Kosovës dhe Bashkimit Evropian e cila shërben për t’u dhënë prioritet obligimeve kryesore të Marrëveshjes së Stabilizim-Asociimit (MSA) në fushën e (I) qeverisjes së mirë dhe sundimit të ligjit, (II) konkurrueshmërisë dhe klimës së investimeve, si dhe (III) punësimit dhe arsimit.

Në këtë konferencë do të prezantohen të gjeturat nga monitorimi i obligimeve të mbetura dhe të parapara që të finalizohen gjatë vitit 2018, sipas vendimit nr. 01/13 të Qeverisë së Kosovës për prioritetet kyçe të Agjendës Evropiane për vitin 2018.